Dis die laaste gesprek vanjaar!
7 November 2025
Tema: Wat kan Machiavelli ons leer oor Ekonomiese Oorlog?
Spreker: Raenette Gottardo (voorheen Taljaard)
Medereder: Lydia von Wielligh-Steyn
Niccolò Machiavelli was ’n senior Florentynse diplomaat. Hy is op 29-jarige ouderdom deur Piero Sonderini aangestel en is later deur die Medici-familie opgesluit. Hy het sy meesterstuk, Die Prins, aan Lorenzo de Medici opgedra. Sy denke oor beginsels, en die verskeie uitdagings wat beginselvaste leiers dikwels in die spervuur plaas, is tans meer relevant as ooit tevore. Sy persoonlike ervarings met die magtige Medici-familie is ’n interessante invalshoek om na die huidige fluktuerende globale internasionale ekonomiese orde te kyk. Te midde van globale handelstariefkonflikte en geopolitieke ekonomiese magstryde kan hy ons heelwat oor strategie leer.
Raenette Taljaard, nou Gottardo, het bekendheid verwerf toe sy tussen 1999 en 2004 ’n parlementslid vir die Demokratiese Alliansie was. Sy was die jongste vroue parlementslid. Ná 1999 het sy die akademiese wêreld betree en gedoseer aan die Universiteit van Kaapstad en die Universiteit van die Witwatersrand. Tussen 2006 en 2009 was sy direkteur van die Helen Suzman-stigting en in 2011 is sy benoem tot kommissaris van die Onafhanklike Verkiesingskommissie. Sy beskik oor ’n PhD in politieke wetenskap wat sy aan Stellenbosch Universiteit verwerf het en is ook die skrywer van die boek: Up in Arms: Pursuing Accountability for the Arms Deal in Parliament. Tans werk sy as ’n onafhanklike internasionale konsultant. Sy is lief vir letterkunde, opera en Italië. Raenette het onlangs die gesogte Cavaliere dell’Ordine della Stella d’Italia toekenning van die Italiaanse president ontvang.
IEDEREEN IS WELKOM!
http://filosofiekafee.blogspot.com
Datum: Vrydagaand 5 September 2025
Tyd: vanaf 6nm – 9nm
Plek: ATKV Bôrdienghuis, Breytenbach Sentrum, Wellington
Bespreek asb by Lamé +27828951139 / oopgesprek@filosofiekafee.co.za.
Toegang: R150 pp sluit ‘n welkomsdrankie in.
Betaal asb met dié datum W05/09 en jou naam by hierdie portaal:
Tema: Oorlog in ’n Tegnologiese Era.
Spreker: Pieter Duvenage
Medereder: Mariana Kruger
Die geskiedenis van oorlog strek so ver terug soos die menslike samelewing self. Tog het die aard, omvang en morele implikasies van oorlog in ons hedendaagse tegnologiese tydsgewrig ingrypend verander. Oorlog is nie meer bloot ’n saak van fisieke konfrontasie tussen soldate op slagvelde nie, maar sluit nou ook kubermag, hommeltuigaanvalle, satellietkommunikasie en selfs kunsmatige intelligensie in. Hierdie ontwikkelinge roep dringende vrae op: Wat beteken dit vir ons morele oordeel oor oorlog? En: hoe kan klassieke sowel as moderne filosofiese denke ons help om oorlog in hierdie nuwe konteks te verstaan en te beoordeel?
Die gesprek bestaan uit vier dele:
1. ’n Kort oorsig oor die Regverdige Oorlogsteorie (Just War Theory);
2. ’n Verkenning van hoe Hegel en Heidegger oorlog as ’n moment van geskiedenis en menslike bestaan beskou;
3. ’n Ontleding van Habermas se post-konfliktuele etiek, geskoei op kommunikasie en regmatigheid; en
4. ’n slotbesinning oor die vraag of ons nie vandag verby die Westerse tradisie oor oorlog moet dink nie.
Pieter Duvenage is 'n akademikus, filosoof en politieke kommentator. Ná vele jare in die voltydse akademie is hy tans 'n buitengewone professor in filosofie aan die Noordwes-Universiteit en deeltyds verbonde aan die Hugenote Kollege in Wellington. Hy woon op Stellenbosch en publiseer later vanjaar 'n boek oor bewegende denke en praktiese wysheid.
IEDEREEN IS WELKOM!
http://filosofiekafee.blogspot.com
Datum: Vrydagaand 4 Julie 2025
Tyd: vanaf 6nm – 9nm
Plek: ATKV Bôrdienghuis, Breytenbach Sentrum, Wellington
Bespreek asb by Lamé +27828951139 / oopgesprek@filosofiekafee.co.za.
Toegang: R150 pp sluit ‘n welkomsdrankie in.
Betaal asb met dié datum W04/07 en jou naam by hierdie portaal:
http://pay.yoco.com/filosofiekafee
TEMA: Verkiesings en Vergissings.
SPREKER: Johann Kriegler MEDEREDER: Johann Scholtz
Ofskoon verkiesings natuurlik lank reeds ’n bekende verskynsel was, het die opheffing van koloniale en Sowjet-heerskappy in die tweede helfte van die 20e eeu en die ‘Arabiese lente’ ’n menigte verkiesings ontlok. Regmatige verkiesings is universeel beskou as wesenselement van demokrasie, trouens ’n essensiele deurgangsrite daarvoor. Johann bespreek aan die hand van persoonlike waarneming enkele aspekte van die meegaande vloedgolf politieke en akademiese belangstelling, navorsing en kennis (en wanbegrippe) dienaangaande.
‘Ná ’n leeftyd in die regsberoep val ek toevallig in ’n onbekende en fassinerende nuwe wêreld van verkiesingsadministrasie en -beregting in dosyne ontluikende demokrasieë van Oos-Timor tot Noord-, Wes-, Oos- en Suidelike Afrika via byvoorbeeld Afganistan, Maledive en Irak. Arbitrasies, advokate-opleiding hier te lande en in buurstate, asook in Engeland en Hong Kong, die bevordering van die regsorde en koerantresensies van nie-fiksie hou my besig.’
IEDEREEN IS WELKOM!
Plek: Pronk, Greenlyn Village, Menlopark, Pretoria
Datum: Saterdagoggend 14 Junie 2025
Tyd: 9vm – 12 vm
Bespreek asb by Lamé +27828951139 / oopgesprek@filosofiekafee.co.za.
Toegang: R190 pp sluit ‘n kontinentale ontbyt met koffie of tee in.
Betaal asb met dié datum P14/06 en jou naam by hierdie portaal:
http://pay.yoco.com/filosofiekafee
TEMA: Die Suid-Afrikaanse kernwapenprogram: mites en waarhede.
SPREKER: Lydia von Wielligh-Steyn
Suid-Afrika is 'n uitstekende illustrasie van hoe belangrik konteks is om historiese gebeure te begryp. Die land het gedurende die tagtigerjare oor 'n gesofistikeerde kernwapenprogram beskik. Vandag is min mense nog bewus van die feit dat Suid-Afrika uraan kon verryk en ses kernwapens geproduseer het. Dit het teen die agtergrond van die Koue Oorlog op globale vlak - en streekbedreigings ter plaatse - geskied. In 1989 het die winde van politeke verandering egter begin waai en dit is weerspieël in die aftakeling van die kernwapens en Suid-Afrika se heraansluiting by die internasionale gemeenskap. Tot vandag toe bly Suid-Afrika die enigste land ter wêreld wat vrywilliglik van kernwapens, wat op plaaslike bodem geproduseer is, ontslae geraak het. Was dit 'n wyse besluit, gegewe die hernieude spanning en onsekerheid wat tans weer op internasionale vlak heers?
Lydia von Wielligh-Steyn het in Pretoria grootgeword en studeer. Sy het vier jaar in Parys gewerk en daarna teruggekeer na Suid-Afrika waar sy by verskeie Franse instansies gewerk het. Sy was 23 jaar in diens van 'n groot parfuumhuis waar sy met internasionale kliënte gewerk het en olfaktoriese opleiding gegee het. Sy is mede-skrywer van Die Bom, Suid-Afrika se Kernwapenprogram, wat in 2014 gepubliseer is. Die boek is in 2015 na Engels vertaal en in Wene, Oostenryk, bekend gestel. Sy het 'n meestersgraad in Franse letterkunde en is tans besig met haar PhD oor kernontwapening. Sy is 'n ywerige leser en woon tans in Pringlebaai, tussen die fynbos, berge en see.
IEDEREEN WELKOM!
PLEK: ATKV-Bôrdienghuis, Breytenbach Sentrum, Wellington.
DATUM: Vrydagaand 2 Mei 2025
TYD: Vanaf 6nm
TOEGANG: R150 pp sluit ‘n glasie welkomsdrankie in.
Pizza, soetgoed en koffie/tee is ekstra beskikbaar.
Bespreek asb spoedig by Lamé 0828951139 of oopgesprek@filosofiekafee.co.za en betaal met dié datum W02/05 én jou naam direk by dié portaal http://pay.yoco.com/filosofiekafee
Subscribe to:
Comments (Atom)