Wie weet waar die Willelinge woon? - Louise du Toit
Vir ons gesprek sal Louise kortliks ondersoek instel na die idee van ‘wild’ soos vervat in ‘wildheid’, ‘wildwees’, ‘wildernis’. Die betekenis van die konsep, gewoonlik gekontrasteer met idees soos makheid, bruikbaarheid, gebreek of ingebreek wees, gekultiveer, gedomestikeer, beskaaf en ge-“potty train”, is op sigself al interessant. Maar dan is daar ook die singewende idees daaragter: ons dink tog meestal daar bestaan so iets soos ‘suiwer’ wilde dinge (‘willelinge’!), maar dis nogal moeilik om hulle aan te dui. Of is wildheid eerder teenwoordig oral waar daar lewe is? Maar hoe onderskei ons dan in verskillende lewensvorme tussen hulle wilde en hulle mak kante? Hoe mak is die mens? Ek beoog om aansluiting te vind by Frans de Waal (Primates and Philosophers), Mark Rowlands (The Philosopher and the Wolf), Richard Louv (Last Child in the Woods) en Aldo Leopold (A Sand County Almanac and Sketches Here and There).
“My ma het gegló aan vakansie hou, soos aan min ander dinge. Op die dag wat die skool sluit, moet die kar gepak word en die volgende oggend 3uur vertrek ons met die kombi, skaaphond en vier kinders op vakansie. Kinders word sommer so slaap-slaap in die kar gelaai en word eers wakker as die son oor die Karoo opkom. Somervakansies was by die Breërivermond en wintervakansies was kamp in Kimberley se bosveld. Duisende ure van my grootwordjare het ek die getye, sandbanke, visse, krewels, seegrasse en krappe van die riviermonding en die kliprandjies, kittels, en dongas van die bosveld vry verken. Ek dink my vesels, harsings en alles, is híérvan gemaak."
Louise du Toit is professor in filosofie aan Stellenbosch Universiteit.
IEDEREEN IS WELKOM!
TWEE GRATIS KAARTJIES AAN NUWELINGE TOT DIE GESPREK.
